Estudos recentes sobre a presenza das mulleres no mundo da arte contemporánea indican que, aínda que elas representan arredor do 70 % do alumnado e das persoas graduadas en Belas Artes en España (e as bolsas para estudantes de arte de orixe español no estranxeiro se reparten de xeito bastante equitativo entre homes e mulleres), estas cifras non se reflicten no mercado da arte. Estímase que as mulleres constitúen aproximadamente o 60 % do colectivo de artistas contemporáneas/os; con todo, preto do 70 % dos artistas representados polas galerías son homes. Obsérvanse cifras similares a nivel internacional en feiras de arte, bienais e adquisicións de obras para coleccións.
Por este motivo, a iniciativa Expostas deste ano busca visibilizar esta fenda de xénero no mundo da arte dando a coñecer cinco figuras destacadas das artes visuais galegas que acadaron recoñecemento internacional. As artistas protagonistas son a pintora abstracta Berta Cáccamo (superior esquerda), a muralista Lula Goce (superior centro), a pintora e cofundadora do Grupo Atlántica Menchu Lamas (superior dereita), a pintora e docente Almudena Fernández Fariña (inferior esquerda) e a artista multidisciplinar e educadora artística Rut Martínez López de Castro (inferior dereita).
expostas.org 